ХАЛЫҚАРАЛЫҚ МЕДБИКЕ КҮНІ ҚАРСАҢЫНДА
ауруханамыздың орта медперсоналы туралы әңгімемізді жалғастырамыз.
Койайдарова Раушан Тыныбаевна
Алматы Қалалық жедел шұғыл көмек көрсету ауруханасы клиникалық-диагностикалық зертхананың фельдшер-зертханашысы
Еңбек өтілі – 12 жыл
– Медицина бала кезден арманым болды. Анам да менің медицинаны таңдауымды қолдады, – деп бастады әңгімесін Раушан Койайдарова. –
Алматы Қалалық жедел шұғыл көмек көрсету ауруханасында 2011 жылдан бастап істеп келемін.
Клиникалық-диагностикалық зертханада жұмыс істеу өте қызық.
– КДЗ фельдшер-зертханашысы ретінде мен науқастардың зертханалық зерттеулерімен айналысамын. Менің жұмысыма алынған үлгілерді жинау, өңдеу және талдау, сондай-ақ нәтижелерді бағалау және дәрігерлерге есептерді дайындау кіреді.
КДЗ фельдшер-зертханашысының негізгі міндеттерінің бірі – зерттеудің жоғары сапасын қамтамасыз ету. Ол үшін заманауи құрал-жабдықты пайдаланып, зертханада белгіленген нормалар сақталуы тиіс. Сонымен қатар, зертханалық диагностиканың соңғы жетістіктерінен хабардар болу үшін зертханашы өз дағдыларын үнемі жетілдіріп, біліктілігін арттырып отырады.
– Науқастарды дәл және дер кезінде диагностикалау үшін біздің жұмыстың маңызы зор. Біздің зерттеулердің арқасында дәрігерлер дұрыс емдеу шешімін қабылдап, ауыр аурулардың асқынуын болдырмайды.
Сондай-ақ, КДЗ фельдшер-зертханашысы мұқият және жауапты болуы керек.
– Пациенттерімізге ең сапалы медициналық көмек көрсету үшін мен өз жұмысымды әрқашан жоғары деңгейде және барынша дәлдікпен орындауға тырысамын.
Біздің жұмыста шыдамдылық қажет, зейінділік пен өз ісіне деген адал көзқарас қажет. Мен зертханадағы жұмысты басқа жұмысқа ауыстырмас едім, – деп түйіндеді зертханашы.
