Алматы қалалық жедел шұғыл көмек көрсету ауруханасында иық буындарын ауыстыру бойынша кезекті ота жасалды
Иық түйісуін ауыстыру отасы ең алдымен оның тұрақсыздануы байқалған кезде ұсынылады. Ота қолдың кез келген қозғалысы ауырсынуды тудырғанда және ауырсынуды тек хирургиялық әдіспен шешуге болатын жағдайда жасалады.
Эндопротездеу – сүйек бетінің бұзылған бөліктерін хирургиялық жолмен қалпына келтіруге мүмкіндік беретін ота. Мұндай ота түрлі жастағы пациенттер арасында сұранысқа ие. Жастар мұндай отаны түрлі жарақаттарға байланысты қажет етсе, егде жастағы адамдар – буындардың патологиялық нашарлауына байланысты жасатады.
Иықты алмастыратын имплантаттар пластикалық протезге салынған металл шардан тұрады. Жаңа буын имплантаттардың кобальт-хром қоспасынан жасалған басы және титан аяғы болады.
Сағит Маханов бастаған ота ЖШККА №2 травматология және ортопедия бөлімшесінде МӘМС аясында жасалды.
Отаның ұзақтығы 1,5 сағатқа дейін жетті.
Дәрігерлердің болжамы жақсы: қолдағы ауырсыну басылады, науқастың қол қозғалысы күнделікті өмірде өзіне қызмет етуге жеткілікті көлемде қалпына келеді.
– Отаның бұл түрі қол қозғалғыштығын қалпына келтірудің ең тиімді, кейде тіпті жалғыз жолы болып табылады. Бұл жолмен иық буынының ауыр жарақаттары ғана емес, консервативті терапия тиімсіз болып келетін сүйек және шеміршек тіндерінің өзгерістерін де емдеуге болады, – деп атап өтті №2 травматология және ортопедия бөлімшесінің меңгерушісі Сағит Маханов.
Бұған дейін емхана травматологтары жамбас және тізе буындарын қалпына келтіру бойынша осындай оталарды сәтті орындады, тірек-қимыл аппаратының жарақаттары мен ауруларын емдеуде үлкен тәжірибеге ие болды және бірнеше айдан бері қолдың үлкен буындарын протездеумен айналыса бастады.
– Жамбасты протездеу отасына қарағанда, иық буынын эндопротездеу әлдеқайда сирек жасалады. Соған қарамастан, біз пациенттеріміз қажетті физикалық белсенділік деңгейіне оралуы және аурудың асқынуын болдырмау үшін иық хирургиясын одан әрі дамытуды көздеп отырмыз, – дейді Сағит Әбдіжәліұлы.
